Prezidan ameriken an di sou platfòm Truth Social li a "Sean se yon gwo patriyòt ki te pwoteje fanmi mwen pandan plizyè ane ki sot pase yo, se poutèt sa mwen fè l konfyans pou dirije gason ak fanm vanyan nan Sèvis Sekrè a".
"Li te pwouve kouraj li lè li te riske pwòp lavi l pou l sove m kont yon bal asasen nan Butler, Pennsilvani."
Jou ki te 13 jiyè 2024 la, yon katouch te fwote zòrèy Donald Trump nan yon tantativ asasina kont li pandan li tap menen kanpay nan Pennsilvani.
Prezidan an te blese 'nan zòrèy, e gen yon patizan n nan piblik la ki fè wout pou peyi san chapo, tandiske te gen lòt moun ki soti blese nan atak la.
Sèvis Sekrè a te imedyatman elimine sispèk la, Thomas Matthew Crooks, 20 an, pandan li te pozisyone sou do yon kay ki tou pre a.
Imaj foto ki te make mond la se lè san tap koule sou figi Donald Trump, epi li te leve men li anlè.
Evènman sa a te fòse Direktè Sèvis Sekrè nan epòk la, Kimberly Cheatle, remèt demisyon li apre Kongrè a te griye li nan yon seyans depozisyon.
Nan Florid te gen yon lòt swadizan tantativ asasina nan mwa septanm nan, nan moman kote kandida repibliken an t ap jwe gòlf nan klib li a nan West Palm Beach.
Yo te arete sispèk la, Ryan Routh, e yo te akize l pou tantativ asasina sou yon kandida pou prezidan.
Sean Curran, ki gen 23 ane eksperyans nan Sèvis sekrè a, te responsab divizyon pwoteksyon prezidansyèl la pandan premye manda Trump la.