Gouvènman an anonse li jwenn yon akò ak sendika pwofesè yo pou mete fen nan grèv pwofesè lekòl leta yo.
Nan yon nòt pou laprès, Primati a anonse sendika pwofesè yo siyen yon akò, yè lendi 20 janvye a, pou mete fen nan grèv ki te paralize lekòl leta yo, kote elèv yo pat ka jwenn pwofesè.
Akòz sitiyasyon saa, plizyè santèn elèv nan peyi a, (Jeremi, Okay, Jacmel...) te manifeste pou reklame pwofesè nan klas yo.
Gras a akò ant gouvènman an ak sendika pwofesè yo, "elèv nan tout peyi a retounen lekòl prese prese".
Nan akò ki siyen an, gouvènman an pran angajman pou l ranje sitiyasyon ansyen pwofesè k ap travay san lèt nominasyon e sila yo k ap travay san yo pa touche.
Gouvènman an dakò tou pou li bay anseyan ak pèsonèl ministè Edikasyon nasyonal ak Fòmasyon pwofesyonèl yon kat debi 15 mil goud apati fevriye 2025.