WASHINGTON —
Pwokirè espesyal Jack Smith demisyone nan Depatman Jistis apre li soumèt rapò ankèt li sou Prezidan eli Donald Trump.
Se yon desizyon yo te atann, ki vini pandan gen batay legal sou ki seksyon nan dokiman saa ki ka pibliye nan jou kap vini yo.
Depatman Jistis ameriken te anonse Smith te kite pòs li nan yon dokiman jidisyè samdi, kidonk yon jou apre li te di li demisyone.
Demisyon an, ki fèt 10 jou anvan Trump prete sèman, rive nan moman lajistis fèmen tout pouswit kriminèl kont Trump yo, apre li te fin ranpòte eleksyon prezidansyèl mwa novanm nan.
Kounye a, kesyon an se kisa ki pral rive ak yon rapò 2 volim Mèt Smith ak ekip li a te prepare sou 2 ankèt yo te mennen sou Trump.