"Nou ka fyè de lame nou an, paske modènizasyon li fèt deja. Se nan kad sa a nou deside retire fòs fransè yo nan Kot Divwa nan yon fason konsète epi òganize," se sa Mesye Ouattara te di nan diskou li pou fen dane a.
"Kidonk, kan 43e BIMA a, batayon enfantri maren Port-Bouet (yon komin nan Abidjan), ap retounen bay fòs ame Kot Divwa apati mwa janvye 2025," li te kontinye.
Li presize kan an ap pote non Jeneral Ouattara Thomas d'Aquin, premye chèf eta majò lame Ivwaryen an.
Lafrans te deside rekonfigire prezans militè li nan Lafrik, apre yo te chase l nan twa peyi sayelyen ki gen gouvènman militè ki pa danse kole ak Pari, tankou sa fèt nan Mali, Burkina Faso ak Nijè.
Mwa pase a, nan kèk èdtan, Senegal ak Tchad tou te anonse depa sòlda fransè yo nan peyi yo e yo ofisyelman fè konnen gen yon "reyòganizasyon".
Lafrans te retounen yon premye baz militè nan Tchad 26 desanm, nan Faya, nan ekstrèm nò dezè peyi a.
Kot Divwa rete yon alye enpòtan pou Lafrans nan Lafrik Lwès. Anviron 1.000 sòlda te deplwaye nan 43e BIMA a, sitou nan batay kont djiyadis yo ki ap atake regilyèman nan Sayel ak nan nò kèk peyi nan gòf Gine a.
Madi swa, Prezidan Ouattara te pale tou sou eleksyon prezidansyèl Oktòb 2025 la, li te garanti eleksyon an ap "kalm", "transparan epi demokratik".
Misye Ouattara, ki gen 83 lane mèkredi, poko pran yon desizyon sou si li pral kandida pou yon katriyèm manda.