Nan lannwit dimanch 15 desanm pou rive lendi 16 desanm 2024 la, yon gwoup jèn ak zam te deside atake lopital Bernard Mevs ki chita kò l nan Vilaj Solidarite, sou wout ayopò a, nan Pòtoprens.
Daprè enfòmasyon ki soti nan jounal Le Nouvelliste, lapolis ki te prezan te rive kontrekare plizyè fwa demach bandi sa yo ki pa t sispann tire kòktèl Molotòv sou lopital la.
Atak sa yo lakoz toutfwa yon anbilans ak 2 lòt machin boule epi gen yon pati nan konntenè ki gen eskanè lopital la ki boule tou ; daprè yon bilan pasyèl.
Bandi yo te sible lopital Bernard Mevs aprè lapolis te fin touye 5 nan yo ki t ap eseye mete barikad epi f on jan pou antre anndan lopital la, dimanch swa.
Enfòmasyon yo rapòte tou bandi yo ofiske paske lopital la konn abitye bay polisye ki blese yo swen.