Plis pase 10 mil moun kouri kite lakay yo nan Ti Rivyè Latibonit akoz atak gang Gran grif la sou lokalite Bakousen 10 desanm ki sot pase la.
Selon òganizasyon entènasyonal pou Migrasyon (OIM), yon total 10, 606 abitan Ti Rivyè Latibonit bay talon yo nan komin nan.
OIM fè konnen 64% nan moun k ap kouri yo al refijye yo nan komin Verrette, kote yo desann kay fanmi/zanmi pwòch oubyen y al viv nan kan.
Ajans Nasyonzini souliye gen 4 nouvo sit ki kreye pou akeyi moun sa yo ki te met vwal nan do yo pou chape poul yo pandan atak gang Gran grif la.
Pandan atak sila, gwoup nèg ak zam asasinen pou piti 15 kretyen vivan epi boule plizyè kay sou wout yo.
Nouvo atak sa vini anviwon 2 mwa apre gang Gran Grif la ki gen nan tèt li Luckson Élan, te masakre plis pase 100 moun nan Ponsonde.