Laprimati di li kondane masak sa a ki fèt nan zòn Waf Jeremi (Site Solèy) pandan wikenn ki sot pase, nan yon pòs sou rezo sosyal X, @PrimatureHT, maten lendi 9 desanm 2024 la.
« Gouvènman an kondane ak anpil endinyasyon zak sanginè sa a chèf gang Micanor fè nan Waf Jeremi, ki lakoz 180 konpatriyòt san defans pèdi lavi yo », se sa nou kapab li nan piblikasyon an.
Enstitisyon Premye Minis Alix Didier Fils-Aimé ap dirije a fè konnen gen « yon liy wouj ki franchi ak masak sa a. Pou rezon sa a, Leta pral mobilize tout fòs li pou mache chèche ak aneyanti tout kriminèl sa yo », deklarasyon Laprimati.
Gouvènman an pwofite anonse nan pòs sa a, lajistis pral gen pou l frape ak yon « rigueur exemplaire ». Laprimati te pwofite tou prezante senpati l ak fanmi viktim yo.