Chantè Kenny Haiti ak tout chantèz Fatima Altieri ap jwe Monreyal, Kanada jou k ap samdi 14 desanm 2024 la. Sware sa a, ki rantre nan kad selebrasyon albòm tou nèf chak atis yo, ap fèt nan sal Amiens ki chita kò l sou Boulva Langelier a.
Aprè plizyè kolaborasyon l ak yon pakèt atis nan endistri mizikal ayisyèn nan, Kenny Haiti te rive soti premye albòm solo l, « Time to Shine », nan mwa septanm ki sot pase a. « Kle kou », « Pi bon chwa » ak « Bif » se 3 mizik ki gen plis ekout sou Apple music jounen jodia.
La Nuit des Jeunes 2024: Fatima
Fatima te soti « Pwoteje m » nan mwa novanm 2024 la. Se dezyèm albòm entèprèt mizik « Dodo a » aprè « Enspirasyon » ki te soti nan lane 2019.
« Hello » se pi gwo hit albòm « Pwoteje m » nan jiskaprezan. Mizik sa a te menm soti semèn ki sot pase a nan playlist « Afro-Club, Le hit des platines » sou Radyo Frans entènasyonal (RFI).