Chantez Fatima soti nan lis « Afro-Club, le Hit des platines » ki seleksyone mizik k ap mache nan semèn nan.
Nan lis sa a ki soti jodi jedi 27 novanm 2024 la sou paj Instagram RFI Musique rfi_musique , mizik « Hello » atis la nan dezyèm pozisyon. Fatima pa t pran tan pou reyaji sou kont Instagram li fatiful aprè nouvèl la.
"Se yon gwo lonè pou mwen pou m plase nan lis sa a bò kote yon bann lòt atis ki chaje talan. Gen rekonesans yon enstitisyon tankou rfi_musique se yon vrè privilèj ", se sa entèprèt " Blese" a te pibliye, nan lang franse.
"Hello" se youn nan 12 mizik ki sou dezyèm albòm solo Fatima a, ki rele " Pwoteje m ".
Albòm sa a soti 11 novanm 2024. Oswald, Jude Jean, Toby Anbakè, Phyllisia Ross, Kenny Haiti, Yoan ak Jean Bernard Thomas se non lòt atis ki patisipe sou li.