Dènye bilan Òganizasyon Entènasyonal pou Migrasyon an (OIM) montre plis pase 40 mil sitwayen ki kouri kite lakay yo nan Pòtoprens akoz pwoblèm ensekirite a.
Nan yon rapò li pibliye ayè lendi a, OIM eksplike vyolans gwoup gang yo nan kapital la fòse 41 mil moun kouri kite lakay yo, nan sèlman 10 jou !
Yon sitiyason kritik ki pat janm rive nan Pòtoprens depi mwa janvye 2023, selon sa OIM fè konnen.
Ajans Nasyonzini an souliye anpil nan moun sa yo ensekirite a fòse abandone kay yo a, se de seri de moun ki kouri pou gang 2 ou 3 fwa deja.
Anplis de sa, 90% nan sitwayen sa yo al refijye nan kan, kote aksè ak dlo potab, ti moso lamanjay, swen sante ak bezwen sanitè yo limite.
N ap raple, antou gen plis pase 700 mil sitwayen ki oblije kouri kite kay yo akoz vyolans lan an Ayiti