Gwo kout zam k ap chante ak sèn vyolans nan Pòtoprens fòse plis pase 20 mil moun kouri kite lakay yo, dapre yon rapò Òganizasyon Entènasyonal pou Migrasyon (OIM) pibliye weekend nan.
OIM fè konnen, nan sèlman 4 jou tan gen plis pase 17 mil fanmi ki oblije kouri akoz vyolans gwoup nèg ak zam yo ki kontinye ap simen latwoublay nan kapital la.
Anplis se sa, anpil nan moun k ap kouri yo, se moun ki te kouri deja soti nan yon lòt katye, toujou akoz pwoblèm ensekirite a.
OIM souliye, vag vyolans sa yo pat janm rive nan nivo sa depi mwa dawout 2023 !
N ap raple, pou ane 2024 la, vag vyolans gang yo nan Pòtoprens pote ale prèske 4000 kretyen vivan
Soti jiyè pou rive septanm, gen pou pi piti 1223 moun ki mouri ak 522 blese akoz vyolans gwoup nèg ak zam yo.
Selon yon rapò Nasyonzini gang yo kontwole plis pase 80% nan kapital la, kote plis pase 5.4 milyon moun ap viv.