Kontwòl Kongrè Etazini an an je nan eleksyon Madi a. Rezilta a pral jwe yon wòl kle nan sò plan lejislativ kèlkeswa moun ki ranpote prezidans la - kitse Vis Prezidan Demokrat Kamala Haris oubyen ansyen Prezidan Repibliken Donald Trump.
Tou le 435 syèj nan Chanm Reprezantan an an je nan eleksyon toupatou Ozetazini pou nouvo manda 2 zan, tandiske 34 pami 100 syèj nan sena a an je pou manda 6 zan.
Demokrat gen kontwòl tou mens Sena a e Repibliken yo kontwole Chanm Depite a. Men majorite tou le 2 chanm yo taka ranvèse oswa rete jan yo ye kounyea, dapre sa analis yo predi.
Kèlkeswa sak rive, pati politik ki kontwole 2 chanm yo pap gen yon gwo maj.
Repibliken yo gen anpil chans pou yo ranpòte kontwòl Sena a kote Demokrat yo gen 51 syèj epi Repibliken yo 49. Yon syèj nan Wès Vijini taka chanje te Demokrat a Repibliken epi bay Repibliken yo chans pou yo pran kontwòl Sena a si yo ranpòte yon lòt syèj. Yon ti gwoup senatè kap chache re-eli ap fè fas ak konpetisyon fewos bò kote Repibliken yo.
Yon total 23 sou 34 syèj nan Sena a ki an je se syèj ke Demokrat yo oswa Endepandan yo kontwole. Endepandan sa yo konn aliye yo ak Demokrat yo.
Analis yo di kontwòl Sena a depann sou 7 eleksyon konpetitif tandiske gen mwens pase 40 syèj nan Chanm Depite a ki an je. Sa lakoz chak pati konnen yo gen kontwòl apepre 200 syèj. Aktyèlman Repibliken yo kontwole Chanm Depite a ak yon maj 220 syèj kont 212. Gen 3 syèj ki vid.