Yon seri menas ak bonm ke biwo vot toupatou Ozetazini resevwa sanble se travay Larisi, dapre nouvo enfòmasyon otorite federal ak otorite eta Ameriken yo pibliye.
Premye menas ak bonm yo resevwa bonè Madi maten te lakoz yo te oblije kanpe eleksyon an nan divès kote nan Sidès Joji. Sepandan responsab eta a te kouri vit detèmine menas sa yo pat kredib.
"Nou idantifye sous la e sete Larisi," Sekrete Eta Joji Brad Raffensperger di jounalis yo.
"Yap fè kout mal taye e sanble yo pa vle pou nou genyen yon eleksyon li dewoule byen, ki jis epi presi," misye ajoute. "Yo konprann si yo fè nou goumen youn ak lòt, yo ka konte sa tankou yon viktwa.
Sèlman jefò pou gate eleksyon an sanble li pi laj pase sa.
FBI anonse Madi li "o kouran menas bonm kont plizyè biwo vot nan divès eta."
FBI di plizyè pami menas yo "sanble yo gen orijin yo nan email Ris.
Konplo sispèk Ris la kote yon jefò a la dènyè minit pou gate eleksyon Ameriken an.
Gen yon ka kote FBI di dezenfomasyon "fake news" te ankouraje Ameriken vote pa entènèt akoz swadizan menas yon atak teworis. Lot la ke FBI dejwe te baze sou rezo sosyal yo kote yo tap pwopaje yon videyo fake news sou 5 prizon nan peyi Etazini ki ta mele nan yon konplo pou fè koken nan eleksyon an.
FBI di videyo yo "pat otantik" e yo pa reprezante yon vre menas pou Ameriken.
Jounalis VOA Jeff Seldin ki travay sou koze sekirite nasyonal ekri vesyon orijinal repotaj sa a
