Rezilta eleksyon an komanse tonbe Madi swa nan kous sere ant Vis Prezidan Kamala Harris ak ansyen Prezidan Donald Trump.
Trump, kap chache reprann Mezon Blanch la apre li te pèdi eleksyon 2020 an, ranpote la viktwa nan eta kote li rete a, Florid, sa ki ba li 30 vwa elektoral.
Harris, jan yo te prevwa l ranpote la viktwa nan eta ki pi piti sou kot ès Etazini.
Se kandida ki ranpote 270 vwa elektoral sou yon total 538 ki genyen eleksyon an. Gen kèk eta ki pap vinn konte vwa yo pazavan Mèkredi.
Moun ki ranpote la viktwa - kidonk 270 vwa elektoral yo pral ranpote yon manda 4 an kap komanse nan mwad Janvye a.
Analis politik yo te predi kous la tap deside nan 7 eta chand batay kote sondaj yo endike 2 kandida yo preske egal ego.
Plizyè milyon Ameriken deja vote Madi pou chwazi yon nouvo prezidan Etazini. Yap chwazi ant Vis Prezidan Kamala Harris, ki ta tounen premye fanm ki dirije Etazini oubyen pou remete ansyen Prezidan Donald Trump nan Lamezonblanch apre li te pèdi eleksyon 2020 an.
Etidyan Repibliken nan Kolej Kalifoni vote nan Berkeley, Kalifoni 5 Nov. 2024.
Anons ofisyèl rezilta yo pral depann de si kous la sere epi konbyen tan yo pran pou konte vwa yo. Li posib pou nou konnen kiyès ki genyen byen ta Madi swa oubyen bonè Mèkredi. Men tou, li posib pou nou pa konnen pou plizyè jou - jan sa te rive sa gen 4 an desa.
Ni Harris, ni Trump rasanble yon gwoup avoka ki gen anpil eksperyans pou konteste nempot ki iregilarite yo kwè taka afekte rezilta a epi bay rival yo avantaj la.
Biwo vot yo louvri bonè Madi toupatou nan eta nan rejyon ès Etazini, kote moun te fè la ke pou vote nan sant gouvènmantal, stasyon ponpye, lekol, legliz ak lot kote. Gen lot biwo vot ki te louvri pi ta atravè 6 zon orè peyi Etazini yo men bonè apremidi a tout biwo vot yo te finn louvri nan tout 50 eta Ameriken yo.
Jounalis VOA Ken Bredemeier ekri vesyon orijinal repotaj sa a