Jij Tribinal Komen an Angelo Foglietta, ki te pran desizyon apre avoka Musk yo te di gayan yo pa chwazi pa aza, pa t bay yon rezon imedyatman pou desizyon an.
Pwokirè Distri Philadelphia, Larry Krasner, te kalifye lotri sa a kòm magouy ki vyole lwa elektoral eta a e li te mande pou fèmen li.
Avoka Musk yo te di nan tribinal lendi a gayan lotri electoral yo pa t genyen pa aza, men se reprezantan gwoup la peye.
Avoka Musk, Chris Gober, te di 2 dènye moun ki pral resevwa yon milyon dola anvan eleksyon prezidansyèl madi a, ap nan Arizona lendi ak nan Michigan madi.
"Moun k ap gen yon milyon dola yo pa chwazi pa aza," Gober te di lendi. "Nou konnen egzakteman kiyès n ap anonse ki gen pou resevwa yon milyon dola jodi a ak demen."
Chris Young, direktè America PAC, temwaye ke moun ki resevwa lajan an se moun yo te verifye anvan, pou "teste pèsonalite yo, (epi) asire yo se moun ki pataje menm vale ak gwoup la."
Deklarasyon sa yo te pouse avoka Krasner rele anmwe pou "magouy" ki "gen pou objektif enfliyanse yon eleksyon nasyonal."
Avoka Musk yo, nan agiman final yo, te rele sa "diskou politik fondamantal" paske patisipan yo siyen yon petisyon pou apiye Konstitisyon Etazini an. Yo te di tantiv jiridik Krasner pou fèmen lotri elektoral dapre lwa Pennsylvania a te san objektif paske pa t ap gen plis gayan nan Pennsylvania anvan pwogram nan fini madi.
Krasner kwè ke sa yo bay kòm kado a vyole lwa elektoral eta a epi an kontradiksyon ak sa Musk te pwomèt lè li te anonse pandan yon aparisyon pandan kanpay kandida prezidansyèl Repibliken Donald Trump nan Harrisburg, Pennsylvania, 19 oktòb: "N ap bay yon milyon dola chak jou a moun ki siyen petisyon an, soti kounye a jiska eleksyon an," Musk te fè pwomèt sa.
Young te rekonèt tou PAC a te fè moun yo siyen akò ki anpeche yo divilge enfòmasyon.
"Yo pa t kapab revele vrè rezon ki jan yo te jwenn lajan an, pa vre?" avoka Krasner, John Summers te mande.
"Se egzakteman sa," Young te reponn.
Nan yon pòs medya sosyal 20 oktòb ki te prezante nan tribinal, Musk te di nenpòt moun ki siyen petisyon an te gen "yon chans chak jou pou yo genyen yon milyon dola !"
Summers te entèwoje li sou mo "chans" ak "aza" Musk te itilize, sa ki te fè Young, ki se trezorye PAC a tou, admèt "Aza" pa t "mo mwen t ap chwazi."
Young te di ke gayan yo te konnen yo t ap rele sou sèn nan, men yo pa t konnen espesyalman si yo ta genyen lajan an. Musk pa t asiste nan odyans lan. Li depanse plis pase 70 milyon nan PAC a pou ede Trump ak lòt Repibliken yo genyen nan novanm.
