13 moun anba kòd apre arestasyon yo nan manifestasyon ki dewoule nan premye jou Konvansyon Nasyonal Demokrat la nan Chicago, e pifò arestasyon yo gen rapò ak yon brèch tou kout ke manifestan yo te jwenn nan kloti sekirite a “kote yo te ka wè epi tande sa ki ap pase nan United Center,” ki se estad kote konvansyon an ap dewoule a, se sa lapolis vil la fè konnen madi.
Planifikasyon te fèt pandan tout semenn nan pou pifò manifestasyon yo, pami yo youn ki ap fèt madi swa devan Konsila Israyelyen an. Sepandan, kantite moun ki te prezan nan prensipal manifestasyon an lendi te pi piti lontan pase sa òganizatè yo te espere, kote yo te predi ke 20.000 moun ta pwal okipe beton an.
Sipè-entandan Lapolis Chicago, Larry Snelling, di madi ke foul la te ka gen anviwon 3.500 moun e ke yon gwo majorite nan yo te pasifik. Men kèk nan yo te fè lese-frape ak lapolis, te flite yo ak dlo pwav e te voye boutèy dlo sou yo nan lese-frape ki te fèt nan pak kote te gen yon brèch nan kloti sekirite a, se sa Snellind di. Li di polisye yo pa te flite manfestan yo ak okenn pwodui chimik.
Li di nan yon konferans pou laprès: « Ajan nou yo te moutre anpil kontwòl. Nou pa pwal tolere okenn moun ki ap gagote vil nou an ni fè vyolans ladann. »