Etazini koupe tout èd li konn bay Gabon kòm repons pou koudeta militè 30 Out pase a nan peyi Afrik santral la, men li endike ke li pare pou rebay èd sa yo nan lavni nan ka ta gen pwogrè demokratik nan Gabon ankò.
Washington, ki te deja sispann nan fen mwa septanm nan yon pati nan èd li te konn bay Gabon,te deklare ofisyèlman ke gen yon koudeta ki fèt nan Gabon, kidonk, dapre lalwa Etazini, li oblije mete fen nan tout èd ki pa imanitè nan peyi a.
Pòtpawòl Depatman Deta Matthew Miller di nan yon deklarasyon "Etazini sipòte pèp Gabon an nan aspirasyon li pou li gen demokrasi, pwosperite ak estabilite”.
Nan dat 30 Out 2023, lame nan Gabon te ranvèse Prezidan Ali Bongo Ondimba ki te sou pouvwa a depi 14 ane, nan yon koudeta ke kominote entènasyonal la kritike.
Lame a te nonmen Raymond Ndong Sima kòm Nouvo Premye Minis Gabon.