Haitian Bridge Alliance, yon oganizasyon non-gouvènmantal ki ede migran kap chache antre Ozetazini, fè konnen li mennen yon delegasyon ekspè teknoloji Ayisyen soti Kalifòni pou ale Matamoros ak Reynosa epi Tamaulipas Meksik wikèn fèt travay la - ki se 2-5 Septanm.
Delegasyon an te rankontre apepre 120 Ayisyen kap chache azil Ozetazini e kap viv nan abri pou migran ak lòt refij enfòmèl nan zòn fwontyè a.
Haitian Bridge Alliance fè konnen ekspè tèk yo te eseye rezoud pwoblèm migran yo konfwonte lè yo eseye pran randevou sou app CBP One nan.
Depi mwad Me 2023, tout migran kap chache azil Ozetazuni dwe pran randevou sou aplikasyon CBP One nan. Randevou a ba yo dat pou prezante nan pòs fwontyè kote yo ka mande azil Ozetazini. Si yo pa fè sa, otorite Ameriken yo repouse yo, epi entèdi yo aplike pou azil.
Direktris legal Haitian Bridge Alliance la, Nicole Phillips fè konnen yo gen anpil kè sote akoz plent yo resevwa bò kote moun kap chache azil depi mwad Janvye 2023, ki gen difikilte navige app la oubyen ki paka monte sou li ditou. Sa lakoz yo oblije pase plizyè mwa ap tann pou resevwa randevou.
Philipps di Haitian Bridge Alliance te kontan a mò ke li te jwenn mwayen pou dispoze asistans teknik pou frè ak sè ki sou fwontyè a pou pèmèt yo mande randevou epi mande azil Ozetazini legalman.
Delegasyon ki tal sou fwontyè a ap travay kounyea sou kèk materyo odyo-vizyèl pou ede migran kap chache azil yo rezoud pwoblèm yo konfwonte ak app la.