Angletè avanse nan premye final Mondyal Foutbòl Feminen li apre li ranpòte la viktwa 3-1 sou Ostrali. Ostrali se youn nan peyi oganizatè Mondyal la ane sa a.
Angletè pral fè fas ak Espay nan final la Dimanch 20 Out la.
Ella Toone make premye gòl la pou Liyonès yo nan 36èm minit la pandan ke seleksyon an te dominen posesyon balon an nan premye mitan an.
Sam Kerr te egalize skò a pou Ostrali nan 63èm minit la, sa ki te bay 75,000 spektatè ki te nan stad la anpil kè kontan ak espwa.
Sepandan, chanpyon Ewopeyen an, Angletè, te make 2 gòl apre sa, gras ak Lauren Hemp epi Alessia Russo.
Angletè ak Espay ap patisipe nan premye final yo. Match la pral dewoule nan Stadium Australia nan vil Sydney.
Ostrali limenm pral woule balon ak La Suèd pou detèmine 3èm plas la.