Politik

Zelenskyy: Lachin reprezante yon 'Opòtinite' nan Pwosesis pou Retabli Lapè nan Ikrèn

Nan foto sa a ke Biwo Lapres Prezidans Ikren nan pibliye, Prezidan Volodymyr Zelenskyy (a goch) pale ak solda nan lye kote youn nan batay pi fewos lage ak Larisi a dewoule, Bakhmut, 20 Desanm, 2022.

Prezidan peyi Ikrèn Vladimir Zelenskyy deklare Mèkredi 26 Avril la ke Lachin reprezante yon opòtinite pou ranfòse "règleman ki ta dwe sèvi kòm baz pou lapè ", li fè deklarasyon sa a apre li fin pale ak Prezidan Chinwa Xi Jinping nan telefòn.

Nan yon mesaj videyo, Zelenskiy di "Ikrèn ak Lachin, tankou majorite peyi nan mond lan, enterese nan souverènte nasyon yo ak respè pou teritwa yo."

2 lidè yo te pale Mèkredi pou premye fwa depi jou Larisi te lanse envazyon an nan Ikrèn.

Xi te di Zelenskiy ke Lachin ta voye reprezantan espesyal nan Ikrèn epi kenbe yon chita pale ak tout pati k ap chèche lapè, dapre sa medya leta Chinwa te rapòte.

Zelenskiy di tou ke Xi te eksprime "mo sipò" pou pwolonje yon kontra pou ekspòtasyon sereyal Ikrenyen ki ap soti nan pò Lanmè Nwa li yo.

Moskou te di ke li pap renouvle kontra sereyal la apre 18 Me sof si peyi Lwès yo retire anbago ke yo mete sou ekspòtasyon ble ak angrè Ris la.

Xi, lidè pi pwisan ki evite denonse envazyon ris la nan Ikrèn, te vizite Moskou mwa pase a.

Depi Fevriye, li ankouraje yon plan lapè ki gen ladann 12 pwen, ke Lwès la te resevwa avèk dout, men ke Kyèv bò kote pal te akeyi avèk prekosyon.

Xi te di Zelenskyy, dapre nouvèl ke medya leta Chinwa yo rapòte, ke Lachin pral konsantre sou yon chita-pale lapè, epi fè efò pou 2 kan yo kanpe goumen an pi vit posib.