Chef politik afè etranjè Inyon Ewòp la, Josep Borrell, di lendi ke pandan gen mezantant toujou sou yon pwogram pou founi Ikrèn minisyon, li gen konfyans ke eta manm yo pwal finalize rès detay yo.
Borrell di jounalis yo nan Luxembourg lè li rive pou yon rankont ak minis afè etranjè Inyon an yo ke li sèten ke « tout moun pwal konprann ke nou nan yon sityasyon ijans ekstrèm. »
Yon lòt kote, yon otorite ris rapòte yon atak ak dronn ki fèt sou pò Sevastopol nan Krime bonè jodi lendi a.
Gouvènè ke LaRisi enstale nan vil la, Mikhail Razvozhaev, di sou medya sosyal ke fòs ris yo detwi yon dronn ki te atè, pandan ke yon 2èm eksploze.
Razvozhaev di yo pa rapòte okenn dega ki fèt nan atak la.
Ikrèn pa konfime touswit atak la. Nan mwa Oktòb ane pase, te gen yon atak ak dronn sou flòt LaRisi nan Lanmè Nwa a e dwèt te lonje sou Ikrèn.