Chofè Kamyon ki patka vwayaje ant Etazini ak Kanada an pasan pa Pon Anbasadè a nan vil Detroit te sètoblije pran wout Pon Blue Water ki sitye nan vil Port Huron nan eta Michigan, kote yo pran nan yon lòt blokis.
Kounyela a gen yon kokenn blokis ki kouvri plizyè kilomèt nan Port Huron.
Pon Blue Water la rete ouvè, men kamyon yo ap vanse tou dousman ant pon ki nan Port Huron nan pou rive nan Ottawa.
Sikilasyon ant Etazini ak Kanada atravè Pon Anbasadè a rete bloke, prèske 36 zè apre pon an te oblije fèmen konplètman akoz yon manifestasyon chofè kamyon Kanadyen yo ap fè.
Manifestasyon sa a pou pwoteste kont restriksyon COVID-19 yo nan Kanada te pran anplè Lendi toupatou sou frontyè Kanada pataje ak Etazini an, epi koze blokis.
Konvwa kamyon ki bloke sikilasyon an taka afekte Etazini tou.
Drew Dilkins se Majistra vil Windsor nan Ontario.
"Si Kanada vinn tounen yon peyi ki difisil pou fe komes ave'l, pou transpòte pwodui antre soti pa egzanp, konpayi yo va evolye epi chanje plan pou elimine risk sa a epi evite vil ak kominote tankou Windsor-Essex. Fòk nou konsidere sa pandan nap chache fè fas ak sityasyon aktyèl la," li deklare pandan yon konferans pou laprès.
Nan Washington, Senatè Repibliken Ameriken Ted Cruz, yon Kiben-Ameriken ki reprezante Texas nan Sena a, eksprime sipò pou chofè kamyon Kanadyen yo.
"Mwen kwè chofè Kanadyen yo ap goumen pou libète. Se yon bèl bagay. Manifestan yo pran anplè li soti nan mitan pèp la e mwen kwè chofè Kanadyen yo ap defann non sèlman libète Kanadyen men tou libete Ameriken yo," Senatè Cruz deklare.
Blokis Pon Anbasadè a, ki se pòs frontyè entènasyonal kote ki gen plis aktivite a soulve kè sote bò kote lidè transpo yo sou enpak sa ka genyen nan moman pwovizyon yo diminye akoz pandemi COVID-19 la epi mank anplwaye nan biznis eta Michigan ki depann sou pwodui kamyon yo ap transpòte.
Enfomasyon pou repotaj sa a soti nan Associated Press.