Moun Titanyen, kote misyone Christian Aid Ministries ke gang 400 Mawozo te kidnape yo bat bravo pou liberasyon yo.
"Oh! Se nan ke nou pou misyone yo ta ye pou yo konnen kontantman nou. Daye nou fe prev pandan yo pran'n nan mekontantman nou. Se menm jan kounyea," Faraon di VOA Kreyol.
"Se tankou yon delivrans li ye pou nou. Sa'k fe'm di sa se paske se gras a yomenm anpil ti jen jwenn aktivite," Reginald di nou.
"Anpil kontantman paske nou kontan blan an lage, paske nou te chagren. Si yo pat nan Titanyen yo pat gen misyon sa a nou pa konnen sa'n tap fe," Ferodle deklare.
Nap raple se 16 Oktob pase a ke gang la te kidnape misyone etranje yo. Yo te lage 5 pami yo pandan semen ki sote pase yo.
Sekrete d'eta Antony Blinken pibliye yon mesaj sou kont twitter li kote li di li byen akeyi nouvel la e li eksprime gratitid li bay tout moun ki te ede yo jwenn liberasyon yo.
Pòtpawòl Lamezonblanch la, Karine Jean-Pierre reyaji sou liberasyon 12 misyonè Ameriken gang 400 Mawozo te kidnape ann Ayiti. Moun yo te libere maten an dapre nouvel yo, apre 2 mwa. Li pa klè si gen ranson ki peye pou liberasyon moun sa yo.
"Nou bat bravo pou nouvel ki di yo lib e ke yap resevwa swen yo bezwen apre tray yo sot pase a. klèman nou trè rekonesan devan FBI (Biwo Federal Envestigasyon), Depatman d'Eta ak responsab lapolis Ayisyen yo ki travay san pran souf pou asire misyonè sa yo tounen lakay yo sen e sof," Madan Jean-Pierre, yon Ayisyen-Ameriken di laprès .
Jan Jake Sullivan te di'l lè dram sa a te komanse, "Prezidan an enfòme chak jou sou sitiyasyon sa. Gouvènman Ameriken an travay san pran souf pandan 2 mwa ki sot pase yo pou jwen liberasyon yo, ba yo asistans medikal ak sipò yo pral bezwen apre tout tray yo finn pase," li ajoute.
Jedi maten, Gary Desrosiers, pòtpawòl Polis Nasyonal Ayisyen an konfime nan yon konvèsasyon ak VOA Kreyòl ke gang 400 Mawozo libere rès misyonè gwoup Christian Aid Ministries li te kenbe yo. Derosiers pat vle bay okenn lòt detay.
Yon anplwaye Christian Aid Ministries te konfime nouvel la nan yon konvèsasyon ak VOA Kreyòl maten an tou.
Li poko kle si gen ranson ki peye pou liberasyon misyone sa yo 17 an tou ke gang la te mande 1 milyon dola pa tet pou'l lage sou menas pou'l touye yo si demann sa a pat satisfet.
Yvon Vilnius kontribye a repotaj sa a depi Titanyen, Jacquelin Belizaire kontribye a repotaj sa a depi Washington
