Otorite Meksik yo arete plizyè douzèn migran Jedi, pandan yo tap pase nan eta Chiapas sou wout pou ale Etazuni.
Anvan otorite Meksiken yo te komanse arete moun, te gen preske 200 migran nan gwoup la.
Louis, yon migran Ayisyen ki gen 28 an, di jounalis Associated Press (AP) ke li pa pe arestasyon.
"Noumenm Ayisyen kisa nou ka fè nan Tapachula? Nou pa gen travay ni anyen, kek pami nou ap vwayaje ak madanm, pitit," misye di AP. "Yo pa vle kite nou pase e nou mande prezidan (Andres Manuel Lopez Obrador) fe sa pou nou. Tout migran sa yo vle travèse."
Junior, se yon Ayisyen ki tap viv Chili.
"Nou pa pè arestasyon paske se pase sèlman nap pase isit la," misye di jounalis AP a. " Nou pa plenyen, nou pa trakase pèsonn nou senpman ap mache nan direksyon destinasyon nou. Sakap fèt la a pa bon. Poukisa yo pa kite nou pase? Yo di nou nou bezwen yon pwotokol e lè nou jwen ni epi rive Meksik yo mennen nou tounen Tapachula oubyen Guatemala, Onduras - kivledi nap blije depanse yon lot kob pou nou reprann wout la."
Gwoup ki kite Tapapchula a sa pa gen lontan, ap tann papye migrasyon yo.
Prezidan Meksiken an Andres Manuel Lopez Obrador deklare gouvenman an paka kite migran yo antre nan peyi a paske yo pral fe fas ak risk pandan vwayaj la.
"Nap travay pou jere paket migran sa yo kap rive lakay nou, an menm tan nap fe gouvenman Ameriken an kek egzijans. Mwen espere yo pral aji vit e prese e bay moun sa yo ki kouri kite peyi yo pa nesesite kek opsyon," prezidan Meksiken an deklare.
Gad Nasyonal Meksik la deplwaye plis pase 14,000 solda nan sid peyi a pou jere sityasyon an.
Repotaj sa a baze sou enfomasyon Associated Press
