"Nou bat bravo pou nouvel ki di yo lib e ke yap resevwa swen yo bezwen apre tray yo sot pase a. klèman nou trè rekonesan devan FBI (Biwo Federal Envestigasyon), Depatman d'Eta ak responsab lapolis Ayisyen yo ki travay san pran souf pou asire misyonè sa yo tounen lakay yo sen e sof," Madan Jean-Pierre, yon Ayisyen-Ameriken di laprès .
Jan Jake Sullivan te di'l lè dram sa a te komanse, "Prezidan an enfòme chak jou sou sitiyasyon sa. Gouvènman Ameriken an travay san pran souf pandan 2 mwa ki sot pase yo pou jwen liberasyon yo, ba yo asistans medikal ak sipò yo pral bezwen apre tout tray yo finn pase," li ajoute.
Madan Jean-Pierre di byenet Ameriken kap viv oubyen vwayaje lot bò dlo ak libète Ameriken ke moun kenbe ann otaj, se youn nan pi gwo priyorite administrasyon Biden nan. Li di laprès se Depatman d'Eta ki va bay plis detay sou kesyon sa a.
VOA Kreyòl te mande Depatman d'Eta fè komante sou liberasyon otaj yo maten an, men nou poko jwenn repons. Nou mande FBI fè komante tou, men nou poko jwenn repons.
Anbasad Etazini ann Ayiti poko reyaji piblikman sou liberasyon an.
Nan Kongrè a, Depite Repibliken Bill Huizenga, ki reprezante rejyon wes eta Michigan nan La Chanm de Reprezantan reyaji sou Twitter sou nouvel liberasyon misyonè yo ann Ayiti. Gen kek nan misyonè yo ki se moun eta sa a.
Depite Huizenga deklare "Jodia se yon jou ke nou te espere ki tapral vini, nou te lapriyè pou sa, nou tap travay pou sa. Mwen ta renmen remèsye manm ekip ki tap negosye pou jwenn liberasyon otaj yo pou dilijans yo pou asire tout otaj yo libere sen e sof".
Maten an, Gary Desrosiers, pòtpawòl Polis Nasyonal Ayisyen an konfime nan yon konvèsasyon ak VOA Kreyòl ke gang 400 Mawozo libere rès misyonè gwoup Christian Aid Ministries li te kenbe yo. Derosiers pat vle bay okenn lòt detay.
Yon anplwaye Christian Aid Ministries te konfime nouvel la nan yon konvèsasyon ak VOA Kreyòl maten an tou. Li pat vle bay non ni men li deklare "se yon nouvel ki bay ke kontan."
Yon mesaj Christian Aid Ministries pibliye sou sit entènèt li di:
“Nou bay Bondye glwa paske li reponn priyè nou. Rès 12 otaj yo LAGE! “ Mesaj la ajoute ke “kounyea tou le 17 misyonè nou renmen anpil yo sen e sof. Mèsi pou tout priyè yo pandan 2 mwa ki sot pase yo. Nou espere bay plis enfòmasyon lè nou kapab.“
Gang la te lage 5 pami 17 otaj li te kidnape yo pandan semèn ki sot pase yo.
Nap raple ke gang 400 Mawozo te kidnape 17 misyonè entranje (16 Ameriken ak yon Kanadyen) 16 Oktob pase a. Yo te mande yon ranson $1 milyon dola pa tet pou lage moun sa yo. Nan gwoup la te gen timoun. lidè gang la te menase pou touye otaj yo si yo pat satisfè demann ni an.
Etazini voye plizye responsab lajistis, ansanm ak ajan FBI ann Ayiti pou travay ak Polis Nasyonal Ayisyen an (PNH) sou liberasyon misyonè yo.
Se 21 Novanm pase a ke Christian Aid Ministries te anonse liberasyon 2 misyone. Li pat bay anpil detay sou sikonstans liberasyon yo non plis, eksepte pou di li te kontan a mo moun yo lage, ke yo an bonn eta e ke yap resevwa swen. Apre sa, 6 Desanm yo te lage 3 lòt misyone.
Jacquelin Belizaire kontribye a repotaj sa a.
