Komite Entenasyonal La Kwa Wouj gen gwo kè sote pou sityasyon imanitè a an Ayiti nan moman zak vyolans gang yo ap ogmante epi epidemi kolera a reparèt.
VOA Kreyòl pale ak Martin Schuepp, direktè global operasyon Komite Entenasyonal Kwa Wouj la, ki fek sot vizite Ayiti.
Misye di nou gen yon efò espesyal yo deplwaye pou swaye prizonye ki gen kolera yo nan moman gen kèk nouvèl ki di sityasyon kolera a amelyore.
" Pa rapò ak sityasyon jeneral la - nap respekte done otorite yo ak lòt òganizasyon yo rapòte -- men nan entèraksyon nou ak 18 penitansye an Ayiti kote nap travay pou konbat epidemi kolera ki egziste a nou gen espwa modere ke nou ka rete pwopagasyon kolera a epi amelyore sityasyon an."
Direktè Schuepp di gen plizyè defi ki poze pou La Kwa Wouj pa rapò ak penitansye yo.
" Vreman vre, gen plizye defi ki poze pa rapò ak sistèm penitansye a an Ayiti. Jefò pa nou pandan mwa ki pase yo konsantre sou travay ak patnè nou yo pou konbat epidemi kolera a. Byen antandu li lye ak kondisyon sanitè penitansye yo, yo sichaje ak prizonye e byen antandu gen anpil lòt bezwen nan penitansye sa yo tou, men noumenm nap konsantre nou sou jefò pou konbat kolera a."
Nou mande Direktè Schuepp si gouvenman Ayisyen an kowopere ak jefò Lakwawouj ap mennen an.
"Nou jwi yon bon diyalog pa rapò ak aktivite nap mennen yo men sa ki klè se ke gen anpil travay ki rete pou fè. Prensipal apèl nap lanse a se pou lòt aktè ak nempòt ki moun ki gen enfliyans sou sityasyon aktyèl la nan peyi a pou yo pase a l aksyon, ede nou, dispoze plis asistans, paske gen dè milyon Ayisyen ki bezwen sipò sa a urjaman."
Direktè Martin Schuepp te pale ak VOA Kreyòl depi Pòtoprens, Ayiti, dènye jou vizit li nan peyi a.
