Vis Prezidan Etazini Kamala Harris fè chita tande vityèl ak plis pase yon douzèn lidè Karayib la. Yo te diskite sou kestyon ekonomik, pandemi a, sekirite epi kriz chanjman klimatik la.
"Etazini gen lyen an komen ak nasyon nan Karayib la. Antanke vwazen nou konnen kolaborasyon nou jwe yon wol kle nan pwosperite ak sekirite. Nou konnen tou ke nou pataje menm defi yo, e se poutèt sa mwen oganize rankont sa a pou ranfose kolaborasyon nou epi planifye pou lavni," Harris deklare.
Pami peyi ki te pran pa nan rankont la nou jwenn Ayiti, Barbad, Grenad, Guyana, Trinidad ak Tobago e plizyè lot anko.
Harris di se pa tout peyi ki reprann yo ekonomikman apre dega pandemi a fè. Li di kriz chanjman klimatik la "menase egzistans tout peyi" e ke konsekans gaz efè de sè yo pi grav pou Karayib la pase lot rejyon.
"Nap fè fas ak anpil defi. Pandemi a boulvèse lavi nou ak lavi pèp nou. Rekiperasyon ekonomik la divisil, e dezekilibre pou anpil peyi nan rejyon sa a," viz prezidan an di. "Nap fè fas tou ak chanjman klimatik ki menase egzistans nou e nou tout konnen byen konsekans gas efè de sèr yo genyen sou Karayib la. Fas ak tout bagay sa yo mwen vle di klèman. Etazini pran angajman vizavi peyi vwazen nou e nou pral fè fas ak defi sa yo ansanm. Rankont konsa pa fèt souvan. Donk jodia, pou montre angajman Etazini, mwen pwopoze pou sa tounen yon rankont anyèl."
Vis Prezidan Harris diskite sou trafik dwog ak trafik zam ke li di menase sekirite rejyon an.
"Sou kestyon sekirite a, mwen konnen anpil nan nou gen gwo kè sote pou trafik dwog ak zam ak vyolans ki asosye ak yo. Se poutèt sa nou enkli nan diskisyon sa a lajan adisyonèl ak sipo Etazini ka ofri pou redwi zak vyolans kap fèt nan rejyon an," Madan Harris deklare.
Pou kontre chanjman klimatik, Harris di Etazini pral ede Karayib la fè tranzisyon a yon ekonomi ki baze sou "enèji renouvlab".
Enfomasyon pou repotaj sa a soti nan Associated Press
