Ansyen Depite Ayisyen Arnel Belizaire lib jodia, apre yon jij Kou d'Apèl nan Pòtoprens te pase lòd pou yo lage'l.
"Mwen nan yon batay chanjman, poko gen anyen'k chanje la a, e batay mwen pap kanpe nan wout," Belizaire di laprès ki te rasanble devan prizon kote li lage a.
"Yo pranm yo mete'm nan prizon pou 2 zan, jis paske yo te vle redui'm o silans, nou panse'm pral rete bra kwaze? Non. Nap di tout nèg yo aranje yo pou yo tiye'm - batay la ap kontinye," Belizaire deklare.
Ansyen depite Delmas/Tabarre la te jwenn arestasyon nan antre vil Jakmèl samdi 30 novanm 2019 ansanm ak 7 lòt moun abò 3 machin ki te gen zam, minisyon ak lajan. Komisè gouvènman Pòtoprens la mèt Jacques Lafontant te mete yon manda darè dèyè ansyen depite a anba akizasyon "konplo kont sekirite entèn leta, kote yo te li te menase pou atake anbasad Ameriken an ak brasri La Couronne lan.
Arnel Bélizaire te akonpaye pa Jean Pierre Fleure, Pierre Killick Cémélus, Bélizaire Clermont, Joanel Paul, Garry Phillemond, Mackenton Estoril ak Roberson Harry Joanis nan moman arestasyon li. 2 moun pami 7 lòt moun lapolis te arete ak ansyen Depite Arnel Belizaire jwenn liberasyon yo.
Pierre Killick, ki libere ansanm ak Belizaire te pale ak laprès tou.
"Pierre Killick pap janm kite politik la paske misyon nou se chanje Ayiti. Jodia nou chwazi pou retire Ayiti nan sa'l ye a," li deklare.
Ansyen Senatè Youri Latortue te prezan tou nan moman prizonye yo tap lage.
"Jodia nou pa gen mo pou eksprime kontantman nou, paske kamarad sa yo, se yo'k te nan lari a. Se yo'k tap batay. Nou pata ka - a oken moman pa pote solidarite nou avè yo," Senate Latortue deklare. "Se de moun ki te sakrifye yo pou yo fè batay pèp la."
Avoka Belizaire la, Mèt Caleb Jean Baptiste, ki dekri arestasyon depite a kom "abitrè" ak "ilegal" remèsye lajistis ak Kou d'Apèl la.
"Jodia, la jistis triyonfe," Jean Baptiste deklare. "Lot prizonye politik yo, noumenm nan blok avoka a, n'ap kontinye batay la."
Facebook Forum