LONU Pwomèt Prezidan Ikrèn Plis Asistans Imanitè
NOUYOK (AP) - Sekrete-Jeneral Nasyonzini Antonio Guterres di Prezidan Ikrenyen an Volodymyr Zelensky nan yon konvèsasyon telefon Samdi ke Nasyonzini detèmine pou'l ogmante asistans imanitè li pou pèp Ikrèn nan.
Guterres di li pral lanse yoon apèl Madi pou finanse operasyon imanitè LONU nan peyi sa a kap fè fas ak dega konfli militè, pot pawol Nasyonzini fè konnen.
Peyi Balt ap Fèmen Espas Ayeryen yo pou Avyon La Risi
LITYANI (AP) Peyi Balt yo: Estoni, Letoni ak Lityani deside fèmen espas ayeryen yo pou avyon Ris, reponsab transpo 3 peyi sa yo fè konnen.
Fomilasyon legal mezi a poko finalize e li poko klè kilè entèdiksyon sa a pral antre ann aplikasyon.
Minis Transpo Lityani an Marius Skuodis di laprès objektif 3 peyi yo se pou pase lod entèdiksyon an an menm tan.
Premye Minis Estoni an, Kaja Kallas pibliye yon mesaj sou kont Twitter li Samdi pou di peyi Oksidantal yo ta dwe negosye ak La Risi ekonomikman ak politikman apre envazyon li fè nan Ikrèn nan. Minis la di "pa gen plas pou avyon agresè a nan syèl demokratik yo."
Minis Transpo Letoni an, Talis Linkaits, di ajans nouvèl lokal LETA ke desizyon peyi a pran pou fèmen espas ayeryen li pou avyon Ris yo pral fèt an kowodinasyon ak Estoni, Lityani epi Inyon Ewopeyen an.
Ikrèn Aplike Yon Kouvrefe
KYEV (AP) - Otorite yo nan kapital Ikrenyen an di yon kouvrefe ki ann aplikasyon nan vil la pral rete jis bonè Lendi nan moman twoup Ris yo ap pouse ofansiv yo pi pre Kyèv.
Otorite yo te anonse anvan sa kouvrefe a tap dire ant 5 hè nan apremidi ak 8 hè di maten, men yo te vinn bay plis presizyon apre pou di li pral dire ant Vandredi apremidi ak Lendi maten, pou fè popilasyon an rete lakay yo pandan jounen Dimanch la.
Mezi sa a vini nan moman otorite Ikrenyen yo rapote batay ak ti gwoup twoup Ris ki enfiltre vil la. Gen lot twoup Ris kap vanse sou Kyèv.
Gen kèk sipèmache ki louvri Samdi juskaske kouvrefe a antre ann aplikasyon. Pat gen anpil machandiz disponib. Kounyea kè sote moun genyen se pou konbyen tan pwovizyon sa yo pral dire. Kèk famasi te ouvè men gen nouvèl ki di nouvo livrezon distribitè yo sispann.
Met sou sa, ajans nouvèl Interfax la rapote 3 prensipal rezo telefon mobil Ikrèn yo bloke aksè pou tout kat SIM Ris.
