Responsab Ameriken: Twoup Ris yo Sitye a yon Distans 30 km ak Kyev
Samdi 26 Fevriye: (AP) WASHINGTON - Yon responsab wo plase Depatman Defans Etazini estime gen plis pase 50% pwisans konba Ris ki sitye ozalantou frontyè Ikrèn e yo antre nan peyi a. Sa reprezante yon ogmantasyon konparativman ak sa Etazini te estime Vandredi, kote'l te di gen yon tyè fòs militè Ris la ki te komanse goumen.
Responsab la, ki pale sou kondisyon pou yo pa site non ni, pou li te ka pale de estimasyon entèn Ameriken yo fè, pat vle di konbyen twoup Ris ki nan Ikrèn. Sepandan Etazini te estime La Risi te genyen plis pase 150,000 solda tou pre Ikrèn.
Responsab la di, fòs Ris kap avanse yo sitye apepre 30 kilomèt andeyò Kyèv Vandredi, e ke yon kantite "eleman rekonesans" militè Ris ke li pa spesifye deja antre nan kapital la.
Pandansetan, Ministè Defans Britanik la deklare Samdi ke "vitès avansman Ris la komanse ralanti pwovizwaman petèt akoz gwo difikilte lojistik yo kontwonte ak yon rezistans Ikrenyen pwisan."
"Fòs Ris yo ap eskive vil Ikrenyen kote gen anpil abitan, pandan yap kite twoup yo antoure yo epi izole yo," ministè a fè konnen.
La Risi Poze Veto li pou Bloke Apwobasyon Rezolisyon Konsey Sekirite a sou Ikren
La Risi, yon manm pemanan Konsey Sekirite Nasyonzini an se sel peyi ki vote kont yon rezolisyon ki kondane envazyon li fe nan Ikren. Gen 11 peyi ki vote an fave rezolisyon an pami yo Etazini. Gen 4 lot peyi ki te absteni - pami yo La Chin.
Regleman Nasyonzini di ke si yon manm pemanan Konsey Sekirite a vote non, yo paka apwouve rezolisyon an.
Nan komante li apre vot sou rezolisyon an, Anbasade Etazini an di le mond fet pou'l kondane zak La Risi poze nan Ikren.