Tòrnad ki frape 5 eta Ameriken Vandredi pase a lakoz omwens 88 moun mouri. 74 pami viktim sa yo rete nan eta Kentucky.
Tòrnad la devaste tout sak te sou chimen ni ant eta Arkansas, kote li detwi nèt yon kay pou granmoun pou rive nan Illinwa kote yon sant distribisyon konpayi Amazon sibi gwo domaj.
Dapre gouvènè eta Kentucky a, Andy Beshear, bilan viktim yo taka ogmante pi plis toujou nan moman otorite yo ap travay pou netwaye debri epi jwenn viktim yo.
Nan Dawson Springs, destriksyon an te katastwofik.
Ronda ak Randy Simpson gen chans. Yo sòti vivan.
"Mwmen kwe tele a alarm ki sonnen pou avèti nou ke tornad la tapral frape tout bagay sa yo te fè'm leve. Nou tap eseye jwenn chyen nou yo epi mari mwen te leve. Se nan klozèt chanm a kouche a nou te lage ko nou anvan tornad la frape e si ou gade dega yo, nou gen anpil chans,"Ronda di jounalis Associated Press.
Prezidan Joe Biden pral vwayaje Kentucky demen Mekredi a pou fè konsta dega yo.
Biden deja siyen deklarasyon dijans pou eta Kentucky e li di li pare pou fè mèman parèyman pou Ilinwa. Li ajoute ke li pase lòd bay administrasyon li pou dispoze tout resous nesesè pou responsab lokal ak responsab eta yo kote tornad la frape.
"Nou pral oblije depase sak disponib nan nivo gouvenman federal la, pa egzanp FEMA kapab founi $35 mil dola pou ede moun rebati kay yo. Byen antandi pa gen anpil kay ki koute $35 mil dola. Pandansetan, nou ka dispoze chanm otèl ak kote viktim yo ka viv. Men gen anpil travay pou fe e nou fèk komanse. Nou pral travay ak tout gouvene yo pou asire nap fè tout sa nou kapab," Prezidan an deklare.
Prezidan Biden di mesaj li pou gouvènè yo se gouvènman federal la pral ede yo jwenn tout sa yo bezwen. Li ajoute Nou pral akonpaye yo osi lontan ke yo bezwen.
Kèk enfomasyon pou repotaj sa a soti nan Associated Press.
