Yon jij federal nan Washington pase lòd bay administrasyon Trump la pou l peye lajan asistans etranje li dwe antreprenè ak benefisye don leta anvan 11:59pm Mèkredi swa. Jij la di pa gen okenn siy ki montre administrsyon an te pran mezi pou respekte lòd li te pase anvan sa e ke fok administrayson an sispann bloke fon yo.
Jij Amir Ali pase lòd sa a pandan yon odisyon nan telefòn nan kad yon pwosè òganizasyon ki siyen kontra ak Ajans Ameriken pou Devlopman Entènasyonal ak Depatman d Eta. Lòd jij la efektiv pou travay ki te fèt anvan 13 Fevriye lè jij la te pase lòd pou administrasyon an sispann bloke lajan an.
Malgre lòd sa a, oganizasyon yo, ki gen ladann konpayi devlopman entènasyonal DAI Global ak òganizasyon asistans pou refije HIAS, di yo poko touche.
Jij Ali mande avoka gouvènman an Indraneel Sur Madi si administrasyon an pran mezi pou respekte lòd li pase a. Sur patka souliyen okenn mezi.
Lamezonblanch ak Depatman d Eta pa reponn demann Reuters fè pou komantè.
Madi make 3èm fwa jij Ali, ke predesesè Demokrat Trump la, Joe Biden te nomen, pase lòd bay responsab administrasyon an pou sispann bloke lajan asistans etranje ke yo te jele apre Prezidan Repibliken Donald Trump te pase lòd pou yo pran yon poz 90 jou sou tout asistans etranje.
