Hegseth pwomèt pou l pote yon bon "kilti vanyan sòlda" nan Fòs Ame ameriken yo, si Sena a konfime li kòm minis Defans.
Senatè yo te kesyone l pandan odyans madi a, Hegseth te eseye detounen kesyon yo tap poze l sou akizasyon agresyon seksyèl ak akizasyon yo fè kont li kòmkwa li ta bwè twòp nan espas travay li. Olye de sa, kandida pou plas chèf Pentagòn nan te konsantre sou pwòp eksperyans li genyen kòm ansyen ofisye lame pou l reponn kesyon senatè yo.
Ansyen animatè nouvèl televizyon an te rele tèt li yon "ajan chanjman" pandan senatè yo tap kesyone li pou detèmine si li se pi bon chwa pou dirije lame ameriken an. Prezidan Komite Sèvis Ame nan Sena a, Roger Wicker, di Hegseth pral "fè anpil chanjman" nan Pentagòn nan.
Men yon Senatè demokrat, Jack Reed, di akizasyon ki sou do Hegseth yo "ekstrèmeman enkyetan."
Sena a, kote repibliken yo gen majorite, ap travay san pran souf pou konfime kèk manm nan Kabinè Trump-Vance la anvan 20 janvye, ki se dat kote Trump pral prete sèman.
