Aplikasyon Chinwa saa sanble tèt koupe ak Instagram, pafwa li prezante tèt li kòm "refij" pou tout moun ki te itilizatè TikTok, ke gwoup chinwa ByteDance ap jere.
Gen anpil posibilite pou yon entèdisyon ta tonbe sou TikTok pou li sispann fonksyone sou tèritwa ameriken.
Xiaohongshu se te aplikasyon mobil itilizatè ameriken yo te telechaje plis sou Apple Store ( magazen ki vann aplikasyon mobil pou aparèy mobil Apple yo) lendi 14 janvye a; li te menm devanse yon lòt aplikasyon rezo sosyal ByteDance genyen ki trè popilè, anpalan de Lemon8.
Dimanch 19 janvye a se kapab dènye jou pou Tiktok Ozetazini, sòf si Tribinal Siprèm ameriken an entèvni nan dènye minit kont yon lwa demokrat ak repibliken nan kongrè ameriken an te vote, kote yo te bay TikTok 2 opsyon : swa li vann aplikasyon an bay yon konpayi ameriken oswa li sispann tout sèvis Ozetazini.
Sou TikTok, anpil itilizatè ameriken te fè kanpay pou mande moun al anrejistre sou nouvo aplikayson chinwa a, Xiaohongshu, e gen anpil kreyatè kontni ki te menm fè videyo pou montre lòt itilizatè kòman pou yo kreye pwofil sou platfòm la, ki prèske antyèman an nan lang “Mandaren”.
