Kou Siprèm Venezyela a te bay TikTok lòd pou li peye amann lan nan 8 jou kap vini yo " pou neglijans li, paske li pa t pran mezi nesesè ak apwopriye pou anpeche pwopagasyon piblikasyon ki pale sou tchalendj popilè," se sa jij Tania D'Amelio te deklare.
Nan dat 21 novanm, Kou Siprèm te dakò pou li egzamine ka sa a, apre lanmò twa adolesan ak anpwazonnman 200 lòt elèv nan plizyè lekòl nan peyi a, apre yo te respire sibstans chimik ki te ankouraje nan kad tchalendj popilè yo.
"Avek amann sa, eta venezyelyen an ap kreye yon fon pou viktim TikTok, ki pral sèvi pou konpanse domaj sikolojik, emosyonèl, ak fizik ki te koze lakay itilizatè yo, espesyalman si se timoun ak adolesan," jij la te ajoute.
Prezidan venezyelyen an, Nicolas Maduro, te pale nan fen novanm sou yon envitasyon reprezantan TikTok yo devan lajistis apre lanmò twa jèn sa yo ki te fè defi danjre sa yo. TikTok nan kolimatè plizyè peyi, tankou Etazini, kote li gen plis pase 170 milyon itilizatè.
Otorite yo sispèk aplikasyon an ap fè espyonaj sou Ameriken yo, ap ranmase enfòmasyon pèsonèl, men tou ap sèvi pou fè pwopagann chinwa.
TikTok voye jete akizasyon sa yo. Dapre yon lwa ki te siyen ane sa a, pwopriyetè chinwa TikTok, ByteDance, dwe separe ak aplikasyon popilè sa a anvan janvye oswa li ap riske entèdiksyon Etazini.
Men, prezidan eli Donald Trump, ki pral pran fonksyon li nan mwa janvye a, pa dakò sa, li panse sa ap fè Instagram ak Facebook plis favè.
Nan kòmansman novanm, Kanada te bay lòd pou likidasyon branch TikTok nan Kanada, yo te pale de "risk presi pou sekirite nasyonal", men san yo pa entèdi aksè ak itilizasyon aplikasyon an nan peyi a.
Brezil, sou bò pa l, te bay TikTok lòd pou li pran mezi pou pwoteje done pèsonèl timoun yo, li te pale sou posiblite pou sanksyon.
