Venezyela
Venezyela : Maduro Bay TikTok 72 Zèdtan pou Retire Kèk Kontni Sou Platfòm li
Prezidan Venezyela a, Nicolas Maduro, bay TikTok 72 zèdtan lendi pou retire kontni ki ankouraje defi danjre yo apre lanmò 2 timoun nan peyi a, sinon li pral pran "sanksyon sevè".
Videyo "tchalendj" yo trè popilè sou rezo sosyal yo e yo konn mande moun fè aksyon ki ka mennen lanmò, tankou ekspoze tèt yo a pwodwi toksik.
Defi M. Maduro ap kritike yo, nan ka sa a, enplike pran medikaman.
"Yon tifi 12 lane, ki ale lekòl nan yon lise piblik, mouri jodi a (lendi) nan Petare (nò) paske li vale (medikaman) e li te swiv sa yo rele defi yo (...), tifi a te rive pale pandan li t ap fè kriz epi li di li te wè yo sou TikTok," prezidan an te di pandan emisyon li an “Avèk Maduro”.
Yon jèn gason 14 lane mouri tou apre li te eseye fè youn nan defi sa yo "ki ap sikile sou TikTok", li te ajoute.
Nicolas Maduro mande prezidan regilatè telekominikasyon Venezyela a pou kontakte responsab TikTok nan rejyon an, epi li bay 72 zèdtan pou platfòm la retire "defi sa yo ki abizif epi kriminèl".
"M vle chèf (rejyon) Amerik Latin nan ki abite Meksik la, konnen: lanmò timoun sa yo se responsabilite w, paske se TikTok ki ap pibliye sa yo," M. Maduro te di an kòlè.
Li te avèti TikTok pral sibi "sanksyon sevè" pou "defann" entegrite timoun yo si li pa respekte lòd sa a, pandan li denonse "kriminèl TikTok yo".
Prezidan an ankouraje paran timoun ki ap itilize rezo sosyal yo pou yo veye aktivite pitit yo sou entènèt.
Yon ankèt ouvè nan Venezyela sou ka sa yo.
Nicolas Maduro te deja pran mezi kont rezo sosyal yo: 8 dawout, li te bay lòd pou sispann X (ansyen Twitter), li te akize li kòm responsab dezòd ki te fèt apre reyeleksyon konteste li a 28 jiyè.
X te retounen disponib pou itilizatè prive kèk semenn apre sa, men aksè a toujou limite pou anplwaye konpayi nasyonal telekominikasyon Cantv.
M. Maduro te tou mande pou moun sispann sèvi ak aplikasyon WhatsApp, li te efase aplikasyon an sou telefòn li 6 dawout, selon imaj televizyon yo te montre.
See all News Updates of the Day
Espay Ofri Ofisyèlman Azil Bay Opozan Venezelyen Edmundo González
Espay ofri ofisyèlman azil bay opozan venezelyen Edmundo González Urrutia, kandida ki te anfas Nicolas Maduro nan eleksyon prezidansyèl 28 jiyè a, se sa Minis Afè Etranjè José Manuel Albares te anonse vandredi.
"Demann azil Edmundo González te fè nan Espay la te aksepte, e yo pral notifye li nan jou kap vini yo," se sa ministè a te di bay jounalis yo nan Sena a, apre li te rankontre M. Urrutia nan maten an.
Yo te atann ak desizyon sa a, paske Premye Minis espanyòl Pedro Sánchez te asire depi nan kòmansman septanm, kèk jou apre opozan sa a te rive nan Espay, yo t ap ofri l azil kòm yon "jès imanitè".
Edmundo González te deklare sou X José Manuel Albares te konfime l pandan yo t ap pale "pozisyon Leta espanyòl" la se menm jan ak tout Inyon Ewopeyen an, "liberasyon tout prizonye politik yo e pou Venezyela respekte angajman dwa entènasyonal yo."
"Dokiman an," M. González raple, "presize Inyon Ewopeyen an pral mobilize tout zouti ki disponib pou soutni demokrasi ak yon tranzisyon pasifik ak enklizif nan Venezyela."
Edmundo González te kite peyi li pou Madrid 8 septanm, nan yon avyon militè espanyòl, apre li te chape poul li nan anbasad espanyòl nan Karakas.
Reyeleksyon Nicolas Maduro 28 jiyè a pou yon twazyèm manda sis lane te lakòz opozisyon an konteste ak tout fòs li, paske konsidere Edmundo González Urrutia te genyen avèk plis pase 67% nan vòt yo.
Pwoklamasyon viktwa li a te lakoz aksyon pwotestasyon ak konfwontasyon ak fòs lòd yo, ki te lakòz 28 moun mouri epi prèske 200 blese.
Edmundo González Urrutia te deklare plizyè fwa depi lè sa a li pral nan peyi l 10 janvye pou pran fonksyon prezidan.
Venezyela: Maduro Anonse li Vle Yon "Gwo Refòm Konstitisyonèl"
Prezidan venezyelyen an, Nicolas Maduro, anonse jedi 19 desanm lan li gen entansyon fé "yon gwo refòm konstitisyonèl" nan konstitisyon peyi a pandan twazyèm manda li a.
Nan yon diskou ofisyèl, Maduro te deklare: "Mwen te fòme yon ekip ak plizyè gwo konseye entènasyonal, gwo konseye nasyonal, pou reflechi, ak pèp nou an, sou yon gwo refòm konstitisyonèl ki plis demokratize sosyete Venezyelyen an epi bay plis pouvwa a sitwayen yo."
Nan peyi Venezyela, amannman konstitisyonèl yo dwe ratifye pa yon vòt popilè.
Nicolas Maduro te mande pou yo kreye yon asanble konstitiyan nan ane 2017 pou "pasifye" peyi a, ki te gen pakèt manifestasyon ki t ap mande l lage pyel sou pouvwa a.
Enstitisyon an te pran fen nan ane 2020 san yo pa t rive amande Konstitisyon an, ki te fèt nan ane 1999 e ki te sipò lidè sosyalis Hugo Chavez.
Anons Prezidan Maduro a rive 3 semèn anvan li prete sèman pou twazyèm manda 6 an li gen pou al fè a (2025-2031).
Venezyela: Liberasyon 300 Moun yo te Arete Pandan Vyolans Apre eleksyon yo
Gouvènman an te anonse Jedi a, plis pase 300 moun yo te arete pandan manifestasyon kont reyeleksyon prezidan Venezyelyen an Nicolas Maduro yo te libere.
An total, plis pase 2,400 moun te nan prizon kèk èdtan apre anons viktwa Prezidan Maduro a pandan manifestasyon kote 28 moun te mouri epi prèske 200 lòt te blese.
"Pandan 72 dènye èdtan yo (10, 11 ak 12 desanm), 103 liberasyon te fèt," Ministè Enteryè a te di yon nòt pou laprès.
ONG Foro Penal, ki okipe defans "prizonye politik yo", di AFP jiska prezan, 190 moun te libere: 165 nan kòmansman, apre sa 25 nan dezyèm faz sa a otorite yo mansyone, enkli minè.
Prizonye yo, ki gen ladan anviwon yon santèn adolesan, te akize pou "teworis" epi yo te mete yo nan prizon ki gen gwo sekirite. Anpil nan yo te nan prizon san manda. Gouvènman an te louvri mwayen kominikasyon ki pèmèt denonse yo.
Reyeleksyon Nicolas Maduro nan dat 28 jiyè, pou yon twazyèm manda 6 zan, te konteste anpil pa opozisyon an, ki estime kandida li a, Edmundo González Urrutia, te genyen ak plis pase 67% nan vòt yo.
Maduro di : Prezime Koudeta kont Lula se yon Atak 'Makab'
Prezime koudeta kont prezidan brezilyen an, Luiz Inacio Lula da Silva, se yon plan "vyolan" ak "makab" kont lidè a, tokay Venezyelyen ak alye sosyalis li a, Nicolas Maduro, deklare pandan yon pwogram televizyon.
Lapolis brezilyen te mande enkilpasyon ansyen Prezidan Jair Bolsonaro an koneksyon avèk yon "koudeta" swadizan ki te òganize an 2022 pou anpeche Lula pran pouvwa a.
"Lula se yon gan òm e sa li fè tout lavi li se goumen pou Brezil nan yon fason pasifik, politik ak elektoral. Donk, tout solidarite ak Prezidan Lula devan dekouvèt atak vyolan ak makab sa yo kont li."
Venezyela Pase Lwa pou Pini Moun ki Sipòte Sanksyon Entènasyonal Sòti 25 Jiska 30 Lane Prizon
Palman an Venezyela, kote gouvènman an gen yon majorite total, adopte yon lwa Jedi a ki pini sòti nan 25 pou rive 30 lane prizon moun ki sipòte sanksyon entènasyonal ki vize rejim Prezidan Nicolas Maduro, ki gen kontestasyon apre reyeleksyon li an Jiyè.
"Nenpòt moun ki ankouraje, ensite, mande, envoke, favorize, fasilite, sipòte oswa patisipe nan adopsyon mezi sere boulon (...) yo pral pini ak santans prizon sòti 25 pou rive 30 lane," youn nan atik nan lwa yo endike, ki prevwa tou pou amann ki depase yon milyon dola, ak pèn pou inelijiblite ki rive jiska 60 lane.
"Se yon lwa" pou "pote lòd ak mete limit nan konpòtman trèt nan peyi a “ yon ti gwoup "ki tounen restavèk" Mesye Maduro te deklare.
Yo rele lwa a "Simon Bolivar Liberator Act", li reponn a yon pwojè lwa Chanm Reprezantan Etazini te adopte le 18 novanm nan lide pou ranfòse sanksyon kont Venezyela.
Pwojè lwa sa a, ki dwe resevwa apwobasyon nan men Sena a ak siyati prezidan an pou antre an vigè, te resevwa akwonim anglè Bolivar (Banning Operations and Leases with Illegitimate Venezuelan Authoritarian Regime) e li entèdi gouvènman Ameriken an siyen kontra ak moun k ap fè biznis ak sa Nicolas Maduro dekri kòm "ilejitim".