Plizyè inite espasyalize, tankou SWAT, UDMO, BOID mennen kèk operasyon gwo ponyèt nan depatman Latibonit, nan lide pou dechouke fwaye gang yo.
Pandan operasyon gason pa kanpe sa, lapolis met lapat sou plizyè prezime gang e rekipere kèk teritwa ki te anba kontwòl gang yo, tankou Liancourt, Kafou pèy ak Ponsonde.
Yon lòt bò, sèvis kominikasyon PNH la, konfime yo pèdi yon blende pandan operasyon sa.
Plizyè videyo k ap sikile sou rezo yo montre yon blende ki kankannen anba dife.
Sepandan, PNH fè konnen, blende a te tonbe an pàn nan yon marekaj pandan fòs lòd yo t ap fè patwouy nan lokalite Savyen.
PNH deklare: "Malgre efò polisye yo, yo patka sove blende a. Malfra yo met dife ladan l".
Fòs lòd yo di yo rete detèmine pou kontinye batay pou kraze fwaye gang yo epi tabli lapè ak sekirite nan peyi a.
