Nan yon bilan li pibliye ayè madi a, OIM fè konnen 10,867 abitan nan Pòsmachan kouri kite kay yo akoz bandi san fwa ni lwa ki te deside atake katye popilè sa, ki twouve l nan komin Pòtoprens.
Pifò nan moun sa yo ki bay talon yo nan katye Pòsmachan oblije al viv nan kan, dapre sa OIM rapòte.
Òganizasyon nasyonzini an souliye gen 4 nouvo sit ki kreye pou akeyi nouvo deplase sa yo ki pa sispann ogmante andan peyi a.
Mete sou sa, anpil nan deplase yo, se moun ki te kouri deja pou gang nan lòt katye.
Nouvo atak gang yo nan Pòsmachan pouse do yon pakèt lòt sitwayen ki te deja t ap viv nan kan. OIM rapòte gen 3 sit ki te gen deplase ladan yo ki pou kounya vid, akoz atak gang yo.
Nouvo deplase sa yo, vin ajoute sou plis pase 700 mil moun ki te deja kouri kite lakay yo akoz boulvès ki genyen nan katye yo.
