Nan yon ribrik ki rele "Alo lapolis", Direksyson jeneral PNH la prezante pastè Dieune Day, kòm trafikan zam ak katouch nan dosye legliz episkopal Ayiti a.
Pastè Dieune Day ki te gen yon manda dèyè l, te kouri kite peyi a epi antre nan mawon nan Sendomeng
Pastè a eksplike rezon ki fè l te antre nan mawon an. "Jan yo t ap fleri m sou manda a, sou radyo, sou rezo sosyo agoch adwat. Donk mwen menm, m te retire kò m"
Pi lwen, pastè a voye jete byen lwen akizasyon ki ta fè kwè li nan trafik zam.
"Mwen menm, m poko janm achte yon zam nan vi m. M pa janm fè jwèt zam". Deklarasyon Pastè a pandan l te nan gadavi.
Pastè Dieune Day, 56 lane, jwenn arestasyon l sou fwontyè Sendomeng ak Ayiti apre 1 an edmi l fè nan mawon.
Selon PNH, pastè a ap fè fas ak plizyè lòt akizasyon tankou : evazyon fiskal, kontreband, abi konfyans ak asosyasyon malfèktè.
