« Nouvo non an se Zile. N ap soti yon albòm, n ap toujou jwenn atis nou an, n ap toujou jwenn menm vwa a, menm enèji a ak menm lanmou an », pwomès entèprèt mizik « Mal » la fè fanatik li yo.
Atis la pran desizyon sa a paske li toujou nan chirepit ak « manadjè » li, Sheila Whitaker. Chantèz la ak Sheila pa janm rive jwenn yon antant sou yon kontra yo te siyen ansanm lè yo t ap kòmanse kolaborasyon yo a.
« Tout fanatik Anie Alerte nou pral follow ‘’Zile’’, nou pral voye ‘’Zile’’ monte, nou pral nan bal ‘’Zile’’. N ap montre fi a se pa t janm non an. Se sa nou vle, se moun nou ye a. N ap kite paj YouTube la pou li epi n a pral abone ak paj ‘’Zile’’ a kounya a », deklarasyon Anie Alerte ki pwofite envite fanatik li yo pou y al dezabone ak chanèl YouTube li a, @aniealerteofficial, ki nan men « manager » Whitaker.
Anie Alerte bay fanatik li yo randevou pou janvye 2025. Dat sa a pral make, daprè sa li di, nouvèl etap sa a nan karyèl ak non tou nèf sila a : « Zile ».
