Prezidan-eli Donald Trump deklare Mèkredi li gen entansyon nomen Kari Lake, yon politisyen ak ansyen jounalis eta Arizona kom direktris Vwadlamerik ki se yon medya leta Etazini finanse.
Trump anonse chwa li sou rezo sosyal li a Truth Social. Lake se yon alye politik pwoch prezidan-eli a ki te konn travay kom animatris pou yon stasyon Fox News nan vil Phoenix, eta Arizona.
Lake te travay kom jounalis pandan 27 an anvan li te kite pwofesyon an an 2021 pou l postile pou pos gouvènè Arizona.
Pandan yon tantativ echwe pou Sena a an 2024, Lake te deklare Arizona ta dwe "pran devan ak politik Amerik an Premye yo."
Trump ekri pou di tou Mèkredi ke li pral anonse anvan lontan chwa li pou dirije Ajans Ameriken pou Medya Global la ke moun konnen kom USAGM, ki jere VOA ansanm ak lot medya leta Ameriken finanse. Moun ki okipe pozisyon sa a se prezidan an ki nomen l e fok Sena Etazini apwouve l. Trump di chwa li pou PDG a pral travay sere-sere ak Lake.
Chef USAGM asire jounalis yo reponn misyon yo pou pwodui nouvèl kredib ak korèk pou peyi kote libète laprès limite.
Direktè aktyèl VOA a, Mike Abramowitz voye yon email bay anplwaye VOA yo Jedi maten kote li di li li anons sou chwa Lake la Mèkredi swa e ke li pa resevwa okenn lot enfomasyon pase sak te pibliye sou rezo sosyal.
Abramowitz di: "Mwen kontan travay pou yon tranzisyon pouvwa alèz ni pou USAGM ni pou VOA. Mwen gen entansyon kowopere ak nouvo administrasyon an epi suiv pwosesis" pou nominasyon direktè VOA a.
Yon Lwa Ane 2020 te Restriktire Jestyon Ajans la
PDG USAGM lan gen pouvwa pou anplwaye oubyen revoke direktè rezo yo men dapre yon lwa Repibliken kou Demokrat te apwouve an Desanm 2020, chanjman direktè rezo a vle fè mande apwobasyon majorite manm Komite Konseye Medya Entènasyonal yo
Komite sa a gen ladann 6 manm ke prezidan an nomen, e ki sèvi pou divès ane epitou Sekretè d Eta a. Fonksyon li se konseye PDG a pou asire ke li respekte endepandans editoryal ak entegrite rezo yo e ke yo respekte nivo pi wo standar jounalism yo.
Nan yon mesaj li pibliye sou rezo sosyal X, Lake deklare se yon onè pou yo konsidere l pou pos VOA a. Li di VOA se yon "medya entènasyonal esansyèl" ki pwomouvwa "demokrasi ak verite."
Li ajoute: "Anba lidèship mwen, VOA pral eksele nan misyon li ki se: rakonte istwa sa Etazini akonpli toupatou nan mond lan."
VOA eseye pran kontak ak Lake pou komantè atravè seksyon medya sit entènèt li men lè nou te pare pou pibliye nouvèl la, li patko reponn.
Chak semèn gen 354 moun ki suiv difizyon VOA yo nan 49 lang. Direktè aktyèl la, Abramowitz, se ansyen prezidan Freedom House. Li te travay kom jounalis ak redaktè pou jounal Washington Post pandan 24 an.
