WASHINGTON —
Direktè Biwo Federal Envestigasyon Etazini an, FBI, Christopher Wray deklare li gen entansyon bay demisyon li nan fen manda Prezidan Joe Biden nan mwad Janvye a.
Anons la fèt Mèkredi, yon semèn edmi apre Prezidan-eli Donald Trump te anonse entansyon li pou l nomen lwayalis Kash Patel nan pozisyon sa a.
Pandan yon rankont ak anplwaye FBI yo, Wray te fè konnen li pral demisyonen "apre plizyè semèn refleksyon."
Se Trump ki te nomen Wray nan pozisyon sa a pou yon manda 10 zan. Manda chèf FBI yo sipoze dire espas tan sa a pou pwoteje ajans la kont enfliyans politik lè administrasyon yo ap chanje.
Wray te monte nan pozisyon sa a an 2017 apre Trump te revoke direktè ajans la nan epok la, James Comey.
