Kyèv ap mande depi kèk mwa pou Bèlen livre misil kwazyè long distans Taurus, men chanselye sosyal-demokrat la, Olaf Scholz, toujou refize sa, li pè pou sa ta lakòz yon eskalad ak Larisi.
"Nou konte sou aksyon ki pi fò epi pi desizif soti nan men Almay, soti nan men ou pèsonèlman," se sa Zelensky te deklare pandan yon konferans pou laprès ak Merz, ki t ap vizite Kyèv.
Prezidan Ikrenyen an te espesyalman di li "espere" yon desizyon soti nan Bèlen ki ta pèmèt "ogmante" kapasite "long distans" Kyèv, yon referans ki klèman gen rapò ak misil Taurus yo.
Friedrich Merz, nan bò pa l, te renouvle volonte li pou li voye zam sa yo, ki fèt an Almay ak peyi Swèd, bay Kyèv, pandan li te souliye yo dwe itilize yo sèlman sou teritwa Ris la, kont sib militè yo.
"Nou dwe fè tout sa nou kapab pou pèmèt Ikrèn egzèse dwa li pou defann tèt li san restriksyon pou "mete fen nan lagè sa a pi vit posib," se sa li te deklare bò kote prezidan Ikrenyen an.
"Nou vle pèmèt lame ou a atenn baz militè nan Larisi, men pa popilasyon sivil la, pa enfrastrikti, men atenn sib militè kote ki ap konbat peyi ou la" Merz te ensiste.
Misil Taurus, Kyèv ap mande depi kèk tan san siksè, gen yon distans 500 km, plis pase distans misil balistik Ameriken Atacms yo ak misil kwazyè franse-britanik Storm Shadow / Scalp yo Ikrèn genyen.
"Avèk limitasyon sa a nan kesyon distans, peyi ou an ap goumen ak yon men tache dèyè do l," se sa Friedrich Merz te deklare, peyi li se, dapre Kyèv, dezyèm founisè èd militè pou Kyèv apre Etazini.
