Efiji an bwonz sa gen yon transmetè, yon jilè pa bal ak twa chajè. Sou kote li, ak yon kalachnikov nan men, gen bra dwat li Dmitri Outkine, ki te mouri ansanm avè l, le 23 Out 2023, nan yon aksidan avyon ki te rive de mwa apre yon rebelyon ki echwe an Risi.
Kontrèman ak lòt peyi Afriken kote kontenjan yo te reyòganize anba non "Africa Corps", sa yo rele "Wagner yo" kenbe tout enfliyans yo nan Santrafirik depi yo te deplwaye an 2018, sou demann Prezidan Faustin Archange Touadéra. An retou, gwoup la te jwenn lisans eksplwatasyon pou filyè nan min lò ak dyaman.
Inogirasyon an te fèt an prezans plizyè ofisyèl ak gran chèf Santrafirik, tankou minis defans lan ak chèf eta majò lame a, "nan kad relasyon bilateral" ant RCA ak Larisi, dapre kont Facebook polis nasyonal Santrafirik la.
"Ris yo dwe selebre pou efò yo fè nan peyi nou (...), mwen envite lòt peyi Afriken pou yo pran egzanp sa a pou selebre Prigojine ak tout Ris yo," se sa Elyzée Bafolo, yon ajan imobilye 30 lane, te deklare bay AFP.
Men, Trésor Yazimango, 34 lane, chèf pwojè yon ONG lokal, estime "RCA se yon peyi souvren, e nou pa bezwen estati sa yo. Si Ris yo te vrèman vle devlope peyi a, yo ta dwe itilize lajan sa a pou konstui wout ak amelyore enfrastrikti yo."
Santrafirik, ki make pa yon siksesyon gè sivil, koudeta, ak rejim otoritè depi endepandans li te pran nan men Lafrans an 1960, se youn nan peyi ki pi pòv nan mond lan malgre richès anba tè a.
Konfli yo te diminye nan entansite pandan dènye ane yo, men kèk pòch vyolans toujou egziste, ak atak soti nan gwoup rebèl nan zòn riral yo epi lè lame Sanntrafirik la avèk soutyen alye Wagner li yo riposte.
Evguéni Prigojine te fonde gwoup Wagner an 2014, yo te deplwaye an premyen an Afrik ak Mwayen Oryan anvan yo te mobilize nan Ikrèn. Li te konsidere kòm yon moun ki te pwòch Vladimir Poutin, men li te tonbe nan disgras apre li te bay lòd pou twoup li yo mache sou Moskou nan mwa jen 2023.
Li te mouri ansanm ak yon gwo pati nan eta majò li nan yon aksidan avyon an Risi, li antere nan simityè Porokhovskoye nan Sen-Pitèsbou.
