Nan okasyon sa, premye minis ayisyen an, Alix Didier Fils-Aimé salye pwogrè ki fèt nan goumen kont viris sida a, toutpandan li deplore plizyè milye sitwayen ki paka jwenn aksè ak swen kòmsadwa akoz pwoblèm ensekirite a.
"Malgre pwogrè nan batay kont viris VIH la, plizyè milye Ayisyen kwense nan yon kriz sanitè ak yon kriz sekrite ki rèd anpil", deklare chèf primati a nan yon kominike li pibliye ayè dimanch lan.
Premye minis lan ajoute : "Vyolans yo ak ensekirite sou tout teritwa a rann aksè pou jwenn swen yo preske enposib". Yon sitiyasyon ki mete apse sou klou moun ki bezwen laswenyay.
Pi lwen, chèf gouvènman an fè konnen gen yon pakèt moun ki mouri chak jou, pa paske pa gen tretman pou yo, men paske soti al chache swen nan yon sant sante se yon bagay ki riske anpil.
"Sepandan, nou p ap bay legen" ! Deklarasyon Alix Didier Fils-Aimé ki fè konnen gen anpil jefò k ap fèt pou retabli sekirite nan peyi a epi garanti tout moun jwenn aksè ak swen.
N ap fè sonje Lapolis Nasyonal Ayiti te mennen plizyè operasyon gwo ponyèt nan plizyè lokalite nan Pòtoprens pou eseye kwape bandi yo e pèmèt aktivite rekòmanse kòmsadwa nan kapital la.
