Depi anviwon 2 semèn elèv nan Pòtoprens paka pran chimen lekòl akoz ensekirite a ki ap vale teren.
Vyolans gwoup nèg ak zam yo nan kapital la fòse direktè lekòl yo fèmen pòt enstitisyon eskolè yo, epi fòse paran yo kenbe pitit yo lakay yo. Yon sitiyasyon ki ap vin pi grav chak jou.
Nan okazyon jounen mondyal timoun yo, Unicef ak byennèt sosyal drese yon tablo tris de sitiyasyon timoun yo an Ayiti, kote lekol tounen yon liks.
Selon Unicef prèske 400 mil timoun an Ayiti paka jwenn moso pen ledikasyon, ki se pilye devlopman yo ak avni yo.
Sitiyasyon sa mete an danje tout chans yo genyen pou konstwi yon demen miyo.
Pandan timoun yo pa gen liv nan men yo, Gang yo bò kote pa yo rekrite nan timoun yo epi mete zam nan men yo.
"San edikasyon, san pwoteksyon e san lot solisyon pou antre lajan, timoun yo pedi anfans y oak inosans yo”, deklarasyon UNICEF.
Ajans Nasyonzini an pwofite lanse yon apèl pou atire atansyon kominote entènasyonal la sou kriz imanitè a ki agrave sitiyason timoun yo an Ayiti.
Unicef raple zak vyolans yo an Ayiti fòse plis pase 700 mil moun kouri kite lakay yo, ladan yo 365 mil timoun.
