Nan yon nòt li pibliye ayè madi a, òganizasyon an ki enplike nan bay swen an Ayiti depi 30 lane, fè konnen depi 11 novanm 2024, pèsonèl li yo ap sibi presyon, agresyon ak menas nan men fòs lòd yo.
MSF deklare li pa gen lòt chwa, sinon kanpe aktivite l yo nan Pòtoprens.
"Nan peyi Ayiti tankou lòt kote, nou abitye travay nan kondisyon ensekrite tèt chaje, men lè manm fòs lòd yo tounen yon menas dirèk, nou pa gen lòt chwa, se kanpe fonksyònman pwojè nou yo", deklarasyon Christophe Garnier, chef misyon MSF la an Ayiti.
MSF drese yon lis 4 ensiden soti 11 pou rive 18 novanm kote anbilans li, pèsonèl li ak pasyan l sibi atak oubyen viktim de menas nan men lapolis
Menas lanmò sou pèsonèl MSF nan kafou Rita, agresyon vèbal sou chofè MSF nan Dèlma 33, menas pou touye pasyan MSF yo... se kèk ensidan enstitisyon k ap bay laswenyay la site.
Anpil nan ensidan sa yo, se polisye an sivil, ki fè yo, selon sa MSF fè konnen.
MSF deklare: "Aksyon sa yo fòse òganizasyon an sispann resevwa ak transfere pasyan nan 5 estrikti medikal nou genyen nan kapital ayisyen an pati 20 novanm"
Pou fini, MSF egzije bon jan garanti pou sekirite ak respè medikal ak imanitè, ni bò kote gwoup nèg ak zam yo, ni bò kote brigad vijilans yo e ni bò kote fòs lòd. Se nan sèl kondisyon sa MSF ap rekòmanse aktivite l yo nan Pòtoprens.
