Selon Lionel Lazarre, pawòl adjwen Lapolis Nasyonal Ayiti a, otirite yo rive mete men sou yon kamyon ak yon bis ki te chaje nèg ak gwo zam fan fwa nan zòn pòs machan.
Ajan yo ki te sou brenzeng yo apre mesaj menas bandi yo te fè sikile sou rezo sosyo kòmkwa y ap anvayi Petyonvil, te rete an alét epi rive kanpe atak gang yo.
Pou pi piti 10 nan gwoup nèg ak zam ki t ap tante anvayi komin Petyonvil tonbe nan boukantay kout zam ak fòs lòd yo.
Gen yon pakèt lòt ki jwenn ak zo grann yo lè yo tap chache chape pou l yo nan lòt katye, tankou Boudon ak Petyonvil.
Popilasyon an ba yo bwa kale.
Pandan entèvansyon lapolis la pou kwape bandi yo, fòs lòd yo sezi 3 fizi kalachnikòv ak plizyè katouch asayan yo te gen nan men yo.
Pou jodi madi a aktivite yo paralize nan Pòtoprens pandan nèg ak zam yo t ap twoke kout zam ak lapolis.
Lekòl ak aktivite komèsyal la yo pa fonksyone.
