Selon sa yon repòtè VOA a konstate, tout Gran ri a anba dlo, kote abitan yo se nan dlo y ap mache pou al nan aktivite yo.
Lokalite tankou Vernet, Katajena anba dlo jodi mèkredi 13 novanm lan.
Selon, Roseline Romnis, yon abitan nan vil Okay, dlo yo antre anndan kay moun yo. Abitan yo oblije itilize bokit pou retire dlo anndan lakay yo.
Roseline Romnis, fè konnen, lapli ap tonbe san rete sou vil la depi 24è.
Se jodi mèkredi a lapli a fè yon ti kanpe, selon Roseline Romnis.
N ap souliye gwo lapli sa yo tonbe akoz yon ond twopikal ki tap travèse penensil sid peyi Ayiti, selon sa Sèvis meteyo Ayiti te anonse.
Pou kounya aks santral ond twopikal sa twouve li sou zile Jamayik.
Yon lòt bò, yon lòt ond twopikal twouve l sou lanmè karayib la kapab transfòme an yon depresyon twopikal nan 2 a 7 jou selon sa UHM fè konnen.
Aktivite lapli yo ka kontinye tonbe sou peyi a jodia ak demen jedi.
Nan ka sa Pwoteksyon sivil ak UHM mande popilasyon pou yo rete pridan, sitou lapli yo ap vini ak gwo van.
Pwoteksyon sivil konseye ak tout moun "Pa deplase pou granmesi, pa al kote ki bwaze, fikse tout sa van ka pote ale, piga monte sou do kay, piga ale nan lanmè...
