JetBlue Airways anonse Lendi swa li pral sispann vòl li yo nan direksyon Ayiti jiska 2 Desanm apre dega yon bal fe nan youn nan avyon li yo ki tap tounen Etazini soti Pòtoprens.
Pi bone Lendi, yon avyon Spirit Airlines te sibi kout zam pandan li tap sivole Pòtoprens, sa ki te fòse li chanje direksyon epi al ateri nan Repiblik Dominiken. Ensidan sa a te lakoz JetBlue ak American Airlines te anile vòl yo an Ayiti pou jous Jedi.
JetBlue di vol 935 li an te rive Nouyòk Lendi san okenn pwoblem, men pandan enspeksyon yo te fe apre aterisaj la yo te jwenn ke yon bal te frape avyon an.
JetBlue di lap mennen anket sou ensidan an e lap kolabore ak otorite konsene yo.
Spirit limenm pibliye yon deklarasyon ki fe konnen avyon li andomaje e pap vole apre li ateri nan vil Santiago nan Repiblik Dominikenn. Yon otes de le te blese nan ensidan an men tout pasaje yo sen e sof.
Tout vòl ki tap antre e soti nan ayeropò Toussaint Louverture Pòtoprens la sispann, dapre sa Administrasyon Federal Aviyasyon (FAA) ak Anbasad Etazini fe konnen Lendi.
FAA di gen 2 lòt vòl ki tapral Pòtoprens ke yo detounen pa mezi prekosyon.
Spirit di li sispann vol li sou Pòtoprens ak Kap Ayisyen "ann atandan plis envestigasyon"
Pasaje ki te abò avyon Spirit la Lendi te pran yon lòt avyon pou tounen Fort Lauderdale, kote avyon Spirit la te soti.
Gang ame yo tire plizye fwa sou avyon kap sivole Pòtoprens pandan semen ki pase yo pandan ensekirite a ogmante.
Mwa pase a, gen yon elikopte LONU ki te pran bal pandan li tap sivole Pòtoprens.
